lavur cun geniturs
Lavur cun geniturs
La finamira principala da scadina instituziun da scola ei d’accumpignar e promover mintga singul affon en siu emprender. En quei connex giogan differents facturs ina rolla centrala. D’ina vart han las persunas d’instrucziun ina funcziun da clav en lur agir ed operar. Il fundament per emprender prospereivel vegn denton tschentaus entras las premissas avantagiusas en casa paterna. In scomi denter la lavur sociala, denter la scola, e geniturs cun affons fuorma ina buna basa, per possibilitar emprender prospereivel in svilup favoreivel dils affons.
Sper ils contacts regulars a caschun da seras da geniturs e discuors da geniturs individuals porscha la scola Ilanz/Glion duas ulteriuras plattafuormas da scuntrada:
Forum per geniturs
La scola Ilanz/Glion tgira gia dapi biars onns in forum per geniturs, en special per geniturs dil scalem superiur. Quel survescha surtut sco occurrenza d’informaziun en connex in tema actual per geniturs e persunas d’instrucziun. Ils davos onns ei surtut la tscherna da professiun per las scolaras ed ils scolars dalla secunda superiura duront la jamna da project stada el focus.
Café da geniturs
Geniturs, persunas d’instrucziun, lavur sociala e direcziun da scola s'entaupan per in brat nunsfurzau tier temas specifics elegi dils geniturs. Il café da geniturs vegn menaus atras duas gadas ad onn ina sonda avonmiezdi. Il café da geniturs preveda in cuort referat dil tema pertuccau cun inputs. Silsuenter vegn il tema discutaus en gruppas specificas da ca. 10 persunas tenor scalems.
Café da geniturs - cooperaziun - 17 da november 2018
Tema e general
Il 3. café da geniturs sefatschenta cun il tema „Cooperaziun denter geniturs e scola“. Cooperaziun ei ina vasta noziun, la quala nus lein circumsriver en in emprem pass. El focus stat en special la cooperaziun en connex cun projects ed occurrenzas.
Ina collaboraziun ei sulettamein pusseivla sin quels camps nua che pliras persunas ein responsablas. Per definir ils secturs da cooperaziun sebasa la scola Ilanz/Glion sin las directivas da l’Uniun Svizra dils scolasts. Tenor quella ein suandonts secturs da tener en égl:
- segirtad e beinstar
- promoziun da sanadad e prevenziun
- educaziun ed intermediaziun da valurs
- sustegn d’emprender
- pensums da casa
- cooperaziun (concepts, cussegls da geniturs, projects, etc.)
- nez da medias
- orientaziun professiunala
- occurrenzas da scola cun participaziun dils geniturs
- formaziun e cussegliaziun per geniturs
Cuntegn e decuors
Sco usitau ein ils presents vegni preparai per ils temas cun in referat. Las treis parts vegnan explicadas cheusut.
Schulnetz21
Dapi igl uost 2018 ei la scola Ilanz/Glion commembra dil Schulnetz21. Cheutras ei la scola Ilanz/Glion s’obligada da persequitar sapientivamein ils temas dallas parts da „scolaziun per in svilup persistent“. La scolaziun per in svilup persistent ei ina part dil plan d’instrucziun 21 ed ha per finamira da preparar ils affons per la veta futura en suandonts secturs:
- politica, democratia e dretgs humans
- ambient natural e resursas
- schlatteinas ed egualitad
- sanadad
- svilup global e pasch
- identitads culturalas e communicaziun interculturala
- economia e consum
Pool da resursas
Ils davos onns ei adina puspei vegniu realisau projects en collaboraziun cun ils geniturs. A tut quels geniturs seigi admess cheu in cordial engraziament!
Egl avegnir vul la scola Ilanz/Glion nazegiar pli savens quellas resursas. Igl ei la finamira d’integrar ils geniturs en projects, da nazegiar lur know-how ed aschia emprender d’enconuscher meglier in l’auter. Plinavon essan nus perschuadi, ch’igl ei d’anflar ellas retschas dils geniturs experts che san contribuir enzatgei tier ils temas dalla scolaziun per il svilup persistent.
Reuniun - einander begenen– gemeinsam feiern
Igl onn 2016 ha la vischnaunca Ilanz/Glion retschiert il label „Reformationsstadt Europas“. Glion - ed era la scola - separticipeschan allas festivitads da 500 onns reformaziun. Il patratg fundamental ei denton buc da celebrar la reformaziun sco tala – plitost duei il brat e la scuntrada denter ils singuls loghens da scola, las culturas e las etnias star el center.
Rodund 500 affons frequentan la scola Ilanz/Glion. Quels derivan en tut da 20 differentas tiaras. Era quella varietad duei vegnir risguardada. Nies giavisch eis ei che geniturs interessai sustegnien medemamein la festivitad dils 21 da zercladur 2019.
Finiziun e quintessenzas
Suenter che tut ils visitaders han frequentau las treis gruppas, han ins saviu trer in fazit.
Collaboraziun denter geniturs e scola
Quella gruppa ei vegnida accumpignada dad Ivana Derungs. Ils presents valeteschan la collaboraziun denter scola, lavur sociala e geniturs sco buna. Per in proxim café da geniturs vegn giavischau in tema che „brischa“ a bia geniturs „sut las unglas“. Ils geniturs retscheivan in’invitaziun suenter ch‘ils luvrers socials e la direcziun da scola han tscherniu in tema corrispundent.
Pool da resursas
Suenter il café da geniturs ei il pool da resursas carschius sin rodund 50 commembers. Nus engraziein cordialmein per la promptadad da collaborar maun en maun cun la scola. Bugen nazegein nus quell’aviartadad per menar atras el futur projects communablamein.
Reuniun - einander begenen – gemeinsam feiern
Il project reuniun ei ina gronda schanza da rinforzar la cuminonza enteifer la scola e la vischnaunca. Las ideas ch’ein vegnidas discussiunadas tonschan dad intervestas cun persunas attempadas, sur cuors da cuschinar, saults da costums tochen tier mini-cuors da lungatg. Tut las ideas ein vegnidas rimnadas e surveschan uss alla gruppa da lavur per la planisaziun dils proxims pass. Il fevrer vegnis Vus informai davart il proceder futur.
café da geniturs - dependenza e regl - 14 d'avrel 2018
Tema e general
Sut il tetel «dependenza e regl» vegn il tierz café da geniturs lantschaus la sonda, ils 14 d'avrel 2018 allas 09:00 uras ell'aula a Glion. Ils luvrers socials da scola ed il menader da ressort projects han astgau beneventar 30 participonts, quei che munta ina leva digren dils participonts en cumparegliaziun cun ils 2. café da geniturs.
Il tema «dependenza e regl» ei vegnius giavischaus dalla pluralitad dils participonts dils davos café da geniturs.
Cuntegn e decuors
Suenter il beinvegni ufficial han ils participonts astgau guder il referat da Margrith Meier (menadra digl ambulatori Neumühle a Cuera e collaboratura dil survetsch psichiatric). Sebasau sin sia experientscha sur plirs onns ha dunna Meier saviu informar ils presents sur dil surpassadi schluitond denter las dependenzas dallas substanzas ligiadas e nunligiadas. Co san geniturs ni persunas d’instrucziun reagar, aschigleiti ch’emprems indecis da dubi ch’enzatgei ei buc aschia sco ei duess? Tier quels ed ulteriurs temas ha dunna Meier saviu dar bia tips. Las informaziuns essenzialas dil referat sco indicaziuns e tips ein vegnidas rimnadas dalla lavur sociala e dalla scola Ilanz/Glion en in cudischet che sa vegnir retratgs tier il secretariat ni tier la lavur sociala.
Suenter la part communabla ei vegniu discussiunau vinavon en gruppas pintgas. Nus savein resumar il suandont:
- Il sterment da regls nunligionts allas substanzas (telefonin ni giugs) dominescha las discussiuns sin tut ils scalems.
- Ils carschi ein exempels. Cunzun tier affons pigns ei d’attribuir ina muntada speciala alla funcziun d’exempel.
- En connex cul diever d’apparats electronics, en special cun tablets, dat ei pusseivladads tecnicas per restrenscher il consum. En cass da damondas sa la direcziun da scola bugen dar sclariment.
- Ina buna basa da confidonza ei il meglier fundament per plidentar musters da cumportament problematics.
Finiziun e quintessenzas
Sco gia a caschun dils cafés da geniturs precedents ei vegniu discussiunau aviert ed engaschau. En quei liug seigi engraziau cordialmein a tut ils geniturs!
La lavur che la scola presta sin il sectur prevenziun da regls vegn schazegiada fetg dils geniturs presents. A caschun d’arraschaments cun affons dueien era el futur ils direct pertuccai saver rapportar da lur experientschas. En connex cun regls ligionts allas substanzas ei quei gia succediu en in’jamna da project dall’emprema superiura. Il tema regl da giugs / regl da telefonin duei vegnir integraus en in di da medias.
Finiziun e perspectiva sin il proxim café da geniturs
Alla finiziun dil tierz café da geniturs ei vegniu fatg in pign questiunari. La damonda, schebein il café da geniturs duei era vegnir menaus atras el futur ei vegnida affirmada dils presents. Ultra da quei ei igl arranschament sco tal vegnius resentius sco fetg buns dils presents.
Il proxim café da geniturs ei planisaus il november 2018. Il tema da quel ei „Fuormas da cooperaziun denter scola e geniturs“. Ei legrass nus d’astgar beneventar in grond diember da geniturs il november.
café da geniturs - mobbing - 18 da november 2017
Tema e general
Igl emprem café da geniturs ei vegnius schazegiaus fetg dils geniturs e dallas persunas d’instrucziun presentas. Ord quei motiv ha la direcziun da scola, en collaboraziun cun la lavur sociala, decidiu dad ir igl atun 2017 en ina secunda runda cun il café da geniturs. Tier l’elecziun dil tema ei ina consultaziun dils geniturs dil scalem primar da Glion ida ordavon tier la quala il tema mobbing ei vegnius numnaus il pli savens.
La direcziun da scola ha envidau cun ina brev tut ils geniturs dils rodund 500 scolars dalla scola Ilanz/Glion al café da geniturs ed ha astgau beneventar la sonda avonmiezdi rodund 50 participonts.
Cuntegn e decuors
Suenter café e cornets ha la damaun entschiet cun in cuort referat da nies luvrer social Jürg Marguth cun inputs tier il tema «mobbing». Rinforzai cun quellas empremas informaziuns ei la gruppa gronda vegnida sligiada per in scomi en quater gruppas moderadas. Resuns, damondas, supplicas e giavischs ein silsuenter vegni presentai ella gruppa gronda dils moderaturs. Resumau san suandonts puncts ord la discussiun vegnir nudai:
- Buc mintga carplina ei mobbing. La midada dalla carplina normala tier mobbing sa denton esser currenta. Seresulta in disequiliber denter dus affons (ni in affon ed ina gruppa d’affons), vegn adina puspei il medem affon mudergiaus sur in liung temps, ein quei ferms indecis da mobbing.
- Carplinas denter affons e giuvenils audan tier la veta. Giavischeivel ei ina cultura da carplina nua ch’ei vegn cumbattiu a moda faira. Cumbatter endretg vul esser empriu!
- Ord vesta dils geniturs sa ei esser grev da valetar descripziuns da lur affons – quei caschuna malsegirtad.
- Cu dueien geniturs s’annunziar? Tier midadas da cumportaments frapponts ni in sentiment schliet eis ei adina prudent da contactar la lavur sociala ni la persuna d’instrucziun da classa.
- Miu affon vul buc esser il «portapuglinas» e daventar sez «unfrenda», tgei far? Negina tema da repressalias – sch’in problem sa buc vegnir sligiaus a moda cuntenteivla sin in scalem, sa la via ufficiala vegnir nazegiada da tuts geniturs e scolars.
- Miu affon ei «delinquent», «unfrenda» ni «soci». Co mein nus sco geniturs entuorn cun las rollas differentas, en las qualas igl affon sa esser? Il contact e la collaboraziun denter ils geniturs vegn taxada sco factur da clav.
Quintessenzas
La megliera prevenziun per mobbing ei ina sauna segirtad da sesez. Dapi entgins onns porscha la scola Ilanz/Glion denter auter ina purschida voluntaria (Respect e Wen-Do) per affons dil scalem bass. Quella purschida serestrenscha sin dus dis, quei ch’ei ina bun’entschatta. Deplorablamein frequentan buc tut ils affons quels cuors facultativs, aschia ch’igl ei grev da promover in svilup efficazi.
La scola mira buc naven ed intervegn aschi spert sco pusseivel en cass da mobbing ni dubis en caussa. Tgei san ils geniturs e la scola far, ch’ils affons s’annunzian tier ils carschi sch’ei persequiteschan ina tendenza negativa en lur ambient social? – Tgei pass che suonda sco proxim en quella sparta vegn discutau enteifer ils organisaturs e communicau pli tard sin quella pagina.
Cumplement, avrel 2018:
El dentertemps ei vegniu discussiunau sur eventuals proxims pass da prevenziun encunter mobbing. L'introducziun dil plan d'instrucziun 21 porscha alla scola ed als geniturs ina buna basa el sectur prevenziun. Cun l'introducziun dil rom etica sil scalem primar vegn prescret ligiontamein, ch'ei sto vegnir luvrau vid ils temas "cuminonza" ed "etica". Da l'autra vart porscha la lavur sociala differents moduls dals quals las persunas d'instrucziun san far diever. Quels moduls san era vegnir menai atras duront las lecziuns d'etica.
Cun l'introducziun dil rom medias ed informatica ella 5 e 6avla classa vegn medemamein dau peisa alla prevenziun encunter mobbing da medias. La relaziun cun medias sco era las reglas ed ils prighels da quellas vegnan medemamein tematisai ligiontamein en scola.
Cun la realisaziun dils dus puncts numnai vegn, ord vesta dalla scola vegn prestau entginas caussas sil sectur da prevenziun. Schebein ulteriuras purschidas ston vegnir inizialisadas, vegn il temps a mussar.
Finiziun e perspectiva per il proxim café da geniturs
La finiziun dil secund café da geniturs ei ina perspectiva sin il proxim, ch’ei planisaus el secund semester digl onn da scola 2017/18, stada. Dils geniturs presents ei il tema «Regl tier affons e giuvenils» vegnius giavischaus. El decuors dil secund semester succeda l’invitaziun correspundenta per il café da geniturs. Nus selegrein sin la proxima scuntrada culs geniturs.
Café da geniturs - medias - 12 da november 2016
Tema e general
La primavera digl onn da scola 2016/17 han ils dis da medias per ils affons dalla 5avla e 6avla classa giu liug. Gia per la tiarza gada han ils dis da prevenziun sut il tema «Diever cun medias» giu liug. Responsabels per ils cuntegns ein la lavur sociala, il pedagog da medias ed il ressort projects dall direcziun da scola stai. Per saver eruir tgei parts dil vast tema medias che muentan ils geniturs e che basegnan ina discussiun al di da medias, ein tut ils geniturs dils affons pertuccai vegni envidai.
Cuntegn e decuors
Davart dalla scola, pedagogia da medias e lavur sociala ei il tema medias e la relaziun cun quellas cuort vegnida circumscretta. Ils pugns da vesta ein vegni explicai, prighels e schanzas ord la vesta correspundenta declarai. Silsuenter ei vegniu aviert la discussiun. Ils geniturs e las persunas d’instrucziun che ein stadas presentas, en tut 12 dels, han brattau lur experientschas e temas. Resumond san ils suandonts puncts principals vegnir numnai:
- Cussegls practics e trics per limitar il consum da diever dil telefonin dils affons.
- Brat d’experientschas (co fageis vus quei a casa)
- Ils geniturs ein per part surdumandai cun il tempo accelerau dil mund da medias
- Sclarir damondas giuridicas
Finiziun e quintessenzas
Il café da geniturs ei vegnius terminaus cun café e cornets. La quintessenza ei, ch’il café da geniturs vegn schazegiaus fetg sco plattfuorma da scomi. La rama nunligionta ed informativa dat la pusseivladad da s’exprimer e dar impuls senza sforz. Igl ei vegniu exprimiu il giavisch d’ina purschida concreta per geniturs per star sil current el sectur da medias.
La primavera 2017 ei quei giavisch vegnius ademplius. Las scolaras ed ils scolars da l’emprema superiura han organisau in’occurrenza a caschun dalla quala ils geniturs ein vegni avischinai al mund da medias.